Նորություններ
Հայաստանի սամբոյի ֆեդերացիան առաջատար մարզիկների, մարզիչների, մրցավարների, թիմերի ներկայացուցիչների համար 2019թ. փետրվարի 9-ին, ժամը 12.00-ին «Անի պլազայի» «Նաիրի» դահլիճում կազմակերպում է սեմինար պարապմունք՝ «Սամբոյի միջազգային մրցավարական կանոնակարգ», «Մարզական միջոցառումների մասնակիցների պարտականություններն ու իրավունքները», «Արգելված հնարքներ և գործողություններ» թեմաներով:
ՀՀ առաջիկա առաջնություններին մրցավարական և ներկայացուցչական կազմում ընդգրկվել ցանկացողների համար, սեմինար պարապմունքին մասնակցությունը պարտադիր է:
Չներկայանալու դեպքում՝ անհրաժեշտ է Հայաստանի սամբոյի ֆեդերացիա ներկայացնել գրավոր հիմնավորում:
Հայաստանի սամբոյի ֆեդերացիան շնորհավորում է Հայաստանի 2018թ. լավագույն մարզիկների տասնյակում տեղ գտած բոլոր մարզիկներին, ովքեր անցնող տարվա ընթացքում բարձր պահեցին հայկական սպորտի և մեր հայրենիքի պատիվը, ում հաղթանակներով հպարտացանք, ձեռքբերումներով՝ ուրախացանք:
Մեզ համար անչափ հաճելի, միևնույն ժամանակ՝ պարտավորեցնող է, որ լավագույններից երկուսը սամբիստներ են՝ աշխարհի առաջնության փոխչեմպիոն, Եվրոպայի առաջնության բրոնզե մեդալակիր Գրիգոր Մխիթարյանն ու աշխարհի և Եվրոպայի առաջնությունների բրոնզե մեդալակիր Արսեն Ղազարյանը:
Մեր ակնկալիքներն, իհարկե ավելի մեծ էին, քանի որ տասնյակում ընդգրկվելու իրական հնարավորություն ուներ նաև մեր լավագույն մարզիկը՝ Եվրոպայի չեմպիոն ու աշխարհի փոխչեմպիոն Տիգրան Կիրակոսյանը, ում ընդամենը մի քանի ձայն չբավարարեց տասնյակում տեղ գտնելու համար:
Ի դեպ, Տիգրան Կիրակոսյանը Հայաստանի սամբոյի ֆեդերացիայի կողմից ճանաչվել է տարվա լավագույն սամբիստ:
Մեզ համար չափազանց հաճելի էին հատկապես SMS քվերակությունների արդյունքները, որոնցով մեր երեք մարզիկները գերազանցում էին մյուս մարզաձևերի ներկայացուցիչներին, ինչը խոսում է սամբո մարզաձևի հեղինակության և սիրված լինելու մասին:
Եվս մեկ անգամ շնորհավորելով բոլոր մարզիկներին մաղթում ենք, որ 2019 թվականը լինի առավել բեղուն և հաղթանակներով լի, որ ի պատիվ մեր մարզիկների գալիք տարում միջազգային ասպարեզներում ավելի շատ ծածանվի հայոց եռագույնն ու հնչի Մեր հայրենիքը:
