Նախագահի խոսք
Բարև, հարգելի այցելու:
Ուրախ ենք Ձեզ ողջունել Հայաստանի սամբոյի ֆեդերացիայի պաշտոնական կայքում, որից, կարծում եմ, Դուք հնարավորություն կունենաք բավարար տեղեկատվություն ստանալ՝ մեր աշխատանքի, հայ սամբիստների անցած ուղու, հայկական սամբոյի պատմության, ընթացիկ գործունեության, առաջիկա մրցումների ու առաջնությունների, մարզիկների, մրցավարների, մարզիչների մասին:
Հուսով ենք, որ նաև Դուք՝ Ձեր արձագանքներով և առաջարկություններով կօգնեք մեզ՝ հայկական սամբոն զարգացնելու և հանրահռչակելու գործում: Մաղթում եմ Ձեզ հաջողություններ, հայկական սպորտին՝ նոր ու մեծ հաղթանակներ:
ՆՈՐՈՒԹՅՈՒՆՆԵՐ
Զրպարտությունը և կեղծ տեղեկատվությունը տեղ չունեն Սպորտում
Analitik.am կայքում լույս տեսած <<Սպորտի ոլորտում հնարավոր չարաշահումների հետքերով, Ի՞նչ է կատարվում ՀՀ Սամբոյի ֆեդերացիայում>> վերնագրով հրապարակումն ամբողջովին հերյուրանք է և չի համապատասխանում իրականությանը:
Այսպես.
1. Հոդվածում նշվում է, որ դեկտեմբերի 5-ին հրդեհ է բռնկվել <<Նար Դոսի 53>> հասցեում գտնվող խանութներից մեկում և որ այդ հասցեում գտնվում է <<Սամբոյի և ձյուդոյի օլիմպիական մանկապատանեկան մարզադպրոցը>>: Մարզադպրոցը, իրոք, գտնվում է <<Նար Դոս 53>> հասցեում (իմիջայլոց, այդ տաղավարները անմիջապես մարզադպրոցի պատին կից են և փակում են շենքի պատուհանները), սակայն պետք է փաստել, որ փողոցի մայթեզրին գտնվող խանութ-տաղավարները ոչ մի առնչություն չունեն մարզադպրոցի հետ. դրանք զբաղեցնում են մարզադպրոցի շենքին հարակից փողոցի մայթեզրային հատվածը: Որքանո՞վ են այդ տաղավարներն օրինական և ինչ սկզբունքով են շահագործվում, պետք է պարզեն պատկան մարմինները: Հատկանշական է, որ սույն տաղավարների գոյությունը մարզադպրոցին կից տարածքում ակնհայտ քաղաքաշինական նորմերի խախտում է /տես՝
ՔԱՂԱՔԱՇԻՆՈՒԹՅԱՆ ՆԱԽԱՐԱՐԻ 14 հոկտեմբեր, 2014թ., N 263-Ն Հ Ր Ա Մ Ա Ն-ի 76-ՐԴ ԿԵՏԸ (ՀՀՇՆ 30-01-2014 «ՔԱՂԱՔԱՇԻՆՈՒԹՅՈՒՆ. ՔԱՂԱՔԱՅԻՆ ԵՎ ԳՅՈՒՂԱԿԱՆ ԲՆԱԿԱՎԱՅՐԵՐԻ ՀԱՏԱԿԱԳԾՈՒՄ ԵՎ ԿԱՌՈՒՑԱՊԱՏՈՒՄ» ՇԻՆԱՐԱՐԱԿԱՆ ՆՈՐՄԵՐԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՇԻՆՈՒԹՅԱՆ ՆԱԽԱՐԱՐԻ 2001 ԹՎԱԿԱՆԻ ՀՈԿՏԵՄԲԵՐԻ 1-Ի N 82 ՀՐԱՄԱՆՈՒՄ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ):
Նկատի ունենալով այդ փաստը, տարիներ շարունակ մարզադպրոցը, զբաղեցնելով այս տարածքը, երբեք չի բողոքել այդ տաղավարները հեռացնելու և մարդկանց հացից զրկելու, ինչպես ստում էր քաղաքացին տեսանյութում: Սա քաղաքային իշխանությունների խնդիրն է, այլ ոչ թե մարզադպրոցի: Հրդեհի հաջորդ օրը հրշեջ ծառայության աշխատակիցները հարցուպատասխան - զրույցում նշեցին, որ տվյալ տաղավարները անօրինական են և այն հարցին, թե արդյոք բողոք-պահանջ ունեք հրդեհված տաղավարի տիրոջ նկատմամբ, մեր պատասխանն էր, ոչ, քանի որ տաղավարի ղեկավարը խոստացել էր վերականգնել կարճ ժամանակահատվածում մարզադպրոցի այրված պատուհանները, մաքրել սևացած պատերը և փուլ առ փուլ պատշաճ կատարում է խոստումները: Ընդունելով վերոնշյալը որպես փաստ, նույնպես հերյուրանք է այն արձանագրությունը, թե մարզադպրոցը և ֆեդերացիան փորձել են խոչընդոտել իրենց գործունեությունը այդ տարածքում: Մեր կողմից կատարված քայլերը վկայում են այն մասին, որ տեսանյութում հնչած միտքը, թե իբր սպառնացել ենք տաղավարները այստեղից հեռացնել և իրենց մի կտոր հացից զրկել, նույնպես զրպարտանք է: Մենք չենք թույլատրել այդ տաղավարները տեղադրել այդտեղ, որ իրավասու լինենք դրանք հեռացնելու: Ով թույլատրել է, թող նա էլ հեռացնի: Միակ խնդիրը, որ մտահոգում է մեզ մինչ օրս այն է, որ մարզադպրոցին անմիջապես հարող կրպակներում դագաղների վաճառքը անթույլատրելի է, քանի որ երեխաները մուտք գործելով մարզադպրոց, ականատեսն են դառնում սահմռկելի տեսարանի:
Այն փաստին, որ Սամբոյի ղեկավարությունը ցանկանում է տվյալ տարածքը սեփականացնել և սարքել խանութներ, նույնպես զրպարտանք է, քանի որ ֆեդերացիան դիմել է նախկինում ՀՀ կառավարություն, վթարային հատվածը վերակառուցելու, փոխարենը ստեղծելու միջազգային ստանդարտներին համապատասխան սամբոյի մարզական համալիր, որը ծառայելու է միմիայն մեր ազգին և սպորտին:
Փաստում ենք, որ Սամբոյի ֆեդերացիայի տարածքում փայտե դռների և ընդհանրապես ոչ մի խանութ գոյություն չունի:
2. Հոդվածի հեղինակները, դիմելով մանիպուլյացիաների, ներկայացնում են, թե իբր 2013թ.-ին Սամբոյի ֆեդերացիային հատկացվել է 51 միլիոն ՀՀ դրամ, ՀՀ Երիտասարդության և սպորտի հարցերով նախարարությունից: Ըստ էության, նրանք նկատի են ունեցել 2013թ.-ին ոչ թե ֆեդերացիային, այլ <<Սամբոյի և ձյուդոյի օլիմպիական մանկապատանեկան մարզադպրոց>> ՊՈԱԿ-ին պետբյուջեից հատկացված գումարը, որը նախատեսված է եղել տվյալ տարում մարզադպրոցի աշխատակազմի աշխատավարձի և սպորտային միջոցառումների կազմակերպման համար: Այդ գումարից շինարարության կամ վերանորոգման աշխատանքների իրականացում նախատեսված չի եղել: Հարկ ենք համարում նշել, որ Սամբոյի և ձյուդոյի օլիմպիական մանկապատանեկան մարզադպրոցը բաժանված է երկու մասնաշենքերի, որոնցից առաջինը 2006թ.-ին վերանորոգվել է Հայաստանի սոցիալական ներդրրումների հիմնադրամի կողմից և ապահով ու բարվոք է պարապմունքների համար, իսկ երկրորդը գտնվում է վթարային վիճակում և վերակառուցման կարիք ունի: Հոդվածի հեղինակները հատուկ նպատակով նկարահանել են հենց տվյալ մասնաշենքի կիսավեր սենյակները՝ նպատակ ունենալով ցույց տալ, թե իբր մարզադպրոցը գործում է հենց այդ սենյակներում: Իսկ այն հանգամանքը, որ մարզադպրոցի տարածքում առկա է վարձակալված տարածք, պետք է նշել, որ դա հատկացված է բեռնափոխադրումներ իրականացնող մեկ ընկերության՝ օրենքով սահմանված կարգով, համապատասխան վարձակալական պայմանագրով: Վարձավճարն ըստ պայմանագրի փոխանցվում է մարզադպրոցի հաշվարկային հաշվին և ծախսվում մարզադպրոցի կանոնադրական նպատակների համար:
3. Հոդվածում նշվում է, թե քաղաքացիներից մեկը (նա հարցազրույց է տալիս տեսանյութում) տարբեր տարիներին ֆեդերացիայից վարձակալել է տարածք, որի դիմաց վճարել է 80-100 000 ԱՄՆ դոլար: Հայտնում ենք, որ Սամբոյի և ձյուդոյի օլիմպիական մանկապատանեկան մարզադպրոցի 2-րդ մասնաշենքի մի մասում վարձակալական հիմունքներով 2008 թվականի հունվարից մինչև 2015թ. մարտ ամիսը գործել է ՙՙ Կ.Ս. Ներսիսյան ՚՚ ՍՊԸ-ն,որի տնօրենը տեսագրությունում ապատեղեկատվություն տարածող քաղաքացին է, և որի հետ պայմանագիրը խզվել է 2015թ. մարտի 1-ից (ընդ որում գույքի հանձման-ընդունման համար կազմված հանձնաժողովը արձանագրել է, որ վարձակալող ընկերությունը 187 210 դրամի չափով պարտք է մնացել մարզադպրոցին վարձակալության և ծախսված հոսանքի դիմաց): 2008-2015թթ.-ի ընթացքում որպես վարձակալական գումար Կ.Ս. Ներսիսյան ՚՚ ՍՊԸ-ն վճարել է 11 132 000 ՀՀ դրամ կամ ամսական միջին հաշվով 150 433 դրամ վարձավճար: Վարձակալական պայմանագրերը և մուտքագրված գումարների ծախսերը հիմնավորող փաստաթղթերը առկա են մարզադպրոցի հաշվապահական փաստաթղթերի փաթեթներում:
4. Հոդվածում նշվում է, թե իբր Հայրապետյանի ընտանիքի անդամները՝ կինը, քույրը, եղբայրը, համարվում են ֆեդերացիայի աշխատողներ, ինչը ակնհայտ սուտ է և հերյուրանք, իսկ այն <<տեղեկությունը>>, որ ֆեդերացիայում իբրև մարզիչներ գրանցված են աշխատողներ, ովքեր արտագաղթել են 90-ականներին և նրանց աշխատավարձն ստանում է ֆեդերացիայի նախագահը, նույնպես ակնհայտ զրպարտանք է և նաև այս կեղծ մեղադրանքի համար կեղծ տեղեկատվության հեղինակները պատասխան են տալու օրենքի ողջ խստությամբ:
5. Հոդվածում կեղծ մեղադրանք է հնչեցվում նաև այն մասին, թե իբր ֆեդերացիայի ներկայիս նախագահ Միքայել Հայրապետյանն այդ պաշտոնն ստանձնել է գտնվելով ԱՄՆ-ում: Սա նույնպես կեղծ ու շինծու մեղադրանք է, քանի որ Միքայել Հայրապետյանը ֆեդերացիայի նախագահ է ընտրվել 2018թ. ապրիլի 11-ին կայացած ՀՀ Սամբոյի ֆեդերացիայի արտահերթ համաժողովում, որի վերաբերյալ կազմված արձանագրության տակ ստորագրել են համաժողովի թվով 43 մասնակիցներ:
6. Հոդվածում առկա է հերթական զրպարտանքը այն մասին, թե իբր մարզադպրոցում առկա է սաունա, որը ծառայում է անբարո նպատակներով: Սա բացահայտ հերյուրանք է ու անպարկեշտ մեղադրանք մարզադպրոցի հասցեին, որտեղ կոփվում են բազմաթիվ պատանի սպորտսմեններ: Դպրոցում գործող սպորտային բաղնիքը նախատեսված է մարզիկների համար և ոչ մի կերպ չի կարող ծառայել այլ նպատակներով:
7. Հոդվածի զեղծարարության գլուխգործոցների մեկը, թերևս այն է, որ հոդվածագիրները հերքում են Սամբոյի ֆեդերացիայի բազում մարզիչների ու մարզիկների թափած քրտինք-վաստակը, նշելով, թե իբր Սամբոյի ֆեդերացիան գրանցել է կեղծ աշխարհի չեմպիոնների և դրա դիմաց պետբյուջեից ստացել է ամսական հոնորարներ: Սա, մտացածին ու երևակայական, իրականության հետ ոչ մի աղերս չունեցող մեղադրանք ու անարգանք է Սամբոյի ֆեդերացիայի ու նրա բազմավաստակ կոլեկտիվի հանդեպ: Ֆեդերացիան իր գործունեության տարիների ընթացքում արձանագրել է բազմաթիվ հաջողություններ, տվել բազում չեմպիոններ, նպաստել հայրենի սպորտի զարգացմանը, այդ մասին առկա են բազմաթիվ վկայություններ, ինչպես պետական փաստաթղթերում, այնպես էլ զլմ-ներում: Հոդվածում կասկածի տակ է առնվում նաև Արևիկ Կարապետյանի աշխարհի չեմպիոն լինելու փաստը, ինչը նույնպես ապատեղեկատվություն է. մարզուհին աշխարհի չեմպիոն է դարձել 1999թ. նոյեմբերի 14-ին, ինչն ապացուցող փաստաթղթերն առկա են:
Այսպիսով, մենք ներկայացնելով այս զրպարտությունների ու կեղծ տեղեկատվության շարանը, մի կողմից հերքում ենք այս <<մեղադրանքները>>, մյուս կողմից մեր վրդովմունքն ենք արտահայտում և հակադարձում այն մարդկանց հասցեյին,որոնք չունենալով սրբություն այս կյանքում, փորձում են իրենց ստահոդ ու կեղծ տեղեկատվությամբ թունավորել ազնիվ ու աշխատասեր կոլեկտիվի բնականոն գործունեությունը (կոլեկտիվը իր վրդովմունքը արտահայտել է այս նյութի հրապարակման առնչությամբ,18.12.2018թ. կայացած արտահերթ ժողովում,որի արձանագրությունը կցվում է):